اردوئے معلیٰ

Search

جرم کی کھو شرم گینی یا رسول

اور خاطر کی حزینی یا رسول

کھینچوں ہوں نقصانِ دینی یا رسول

تیری رحمت ہے یقینی یا رسول

رحمۃ اللعالمینی یا رسول

ہم شفیع المذنبینی یا رسول

 

لطف تیرا عام ہے کر مرحمت

ہے کرم سے تیرے چشمِ مکرمت

مجرمِ عاجز ہوں کر ٹک تقویت

تو ہے صاحب تجھ سے ہے یہ مسئلت

رحمۃ اللعالمینی یا رسول

ہم شفیع المذنبینی یا رسول

 

کیا سیہ کاری نے منہ کالا کیا

بات کرنے کا نہیں کچھ منہ رہا

رحم کر خاکِ مذلت سے اٹھا

میرے عفوِ جرم کی تخصیص کیا

رحمۃ اللعالمینی یا رسول

ہم شفیع المذنبینی یا رسول

 

اب ٹھہرتا ٹک نہیں پائے ثبات

دستگیری کر کہ پاؤں میں نجات

جرم کیا ہیں میری کتنی مشکلات

ہے کفایت ایک تیری التفات

رحمۃ اللعالمینی یا رسول

ہم شفیع المذنبینی یا رسول

 

دہر زیرِ سایۂ لطفِ عمیم

خلق سب وابستۂ خُلقِ عظیم

تجھ سے جویائے کرم عاصم اثیم

سخت حاجت مند ہیں ہم تُو کریم

رحمۃ اللعالمینی یا رسول

ہم شفیع المذنبینی یا رسول

 

ہو رہے ہیں ہم جو دوزخ کے حطب

سر پہ یہ اعمال لائے ہیں غضب

رکھتے ہیں چشمِ عنایت تجھ سے سب

تجھ سوا کس سے کہیں احوال اب

رحمۃ اللعالمینی یا رسول

ہم شفیع المذنبینی یا رسول

 

نیک و بد تیرے ثناخوانِ ہمم

لطف تیرا آرزو بخشِ امم

ملتفت ہو تُو تو کاہے کا ہے غم

تو رحیم و مستحقِ رحم ہم

رحمۃ اللعالمینی یا رسول

ہم شفیع المذنبینی یا رسول

 

روؤں ہوں شرمِ گنہ سے زار زار

بے عنایت کچھ نہیں اسلوبِ کار

دل کو جب ہوتا ہے آ کر اضطرار

زیرِ لب کہتا ہوں یہ میں بار بار

رحمۃ اللعالمینی یا رسول

ہم شفیع المذنبینی یا رسول

 

سبز برپا ہو گا جب تیرا نشاں

آفتابِ حشر میں بہرِ اماں

ہووے گی انواعِ خلقت جمع واں

کیوں نہ ہوں سائے میں اُس کے دو جہاں

رحمۃ اللعالمینی یا رسول

ہم شفیع المذنبینی یا رسول

 

روسیاہی جرم سے ہے بیشتر

روسفیدوں میں خجل مجھ کو نہ کر

ایک کیا آنکھیں ہیں میری ہی اُدھر

تجھ سے راجی بے بصر اہلِ نظر

رحمۃ اللعالمینی یا رسول

ہم شفیع المذنبینی یا رسول

 

کچھ بھی جو ہیں واقفِ راز و نیاز

عام تجھ انعام پر کر چشم باز

شعر یہ مشہور سب وے دل گداز

پڑھتے ہیں جائے دعا بعد از نماز

رحمۃ اللعالمینی یا رسول

ہم شفیع المذنبینی یا رسول

 

جب تلک تاثیر کا تھا کچھ گماں

گہ قرآں خواں میر تھے گہ سبحہ خواں

وقت یکساں تو نہیں اے دوستاں

اب یہی ہے ہر زماں وردِ زباں

رحمۃ اللعالمینی یا رسول

ہم شفیع المذنبینی یا رسول

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ