اردوئے معلیٰ

Search

جنتر منتر دھاگے شاگے جادو ٹونے والوں نے

تیری خاطر کیا کیا سیکھا تجھ کو کھونے والوں نے

 

ایک طلسمی سرگوشی پر میں نے مڑ کر دیکھا تھا

مجھ کو پتھر ہوتے دیکھا پتھر ہونے والوں نے

 

اچھے کی امید پہ کتنے مشکل دن کٹ جاتے ہیں

خواب محل کے دیکھے اکثر خاک پہ سونے والوں نے

 

کتنی ماوں نے بچوں کو باتوں میں الجھایا تھا

گلیوں میں آوازیں دیں جس وقت کھلونے والوں نے

 

ایک طرف تو یادیں تھیں اور ایک طرف دیوان میر

دیکھ فضا افسردہ کردی کرب سے رونے والوں نے

 

اسم یار کا ورد وظیفہ کر کے وقت گذارا ہے

اک تسبیح بنا دی تیری یاد پرونے والوں نے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ