اردوئے معلیٰ

جن و انساں اور قدسی آپ کے مشتاق ہیں

 

جن و انساں اور قدسی آپ کے مشتاق ہیں

آپ ہیں مطلوبِ عالم، راحتِ عشاق ہیں

 

ہو نہیں سکتے رقم اوصافِ حسنہ بالیقیں

آپ ہیں خیر الوریٰ، گنجینہء اخلاق ہیں

 

آپ ہیں کونین میں سب سے حسیں یا سیدی

آیتِ ’’فی احسنِ تقویم‘‘ کے مصداق ہیں

 

خالقِ ارض و سماء وصافِ اکبر آپ کا

آپ کے نغمہ سرا قرآن کے اوراق ہیں

 

جز نہیں ہے کلِ ایماں، آپ ہی کا عشق ہے

ان کو کوئی ڈر نہیں جو آپ کے عشاق ہیں

 

بحر و بر ارض و سماء پرکیف نظارے فدا

آسماں پر چاند تارے محوِ استغراق ہیں

 

مجھ سے عصیاں کار پر بھی اے شہِ جود و عطا

آپ کے اکرام ہیں الطاف ہیں اشفاقؔ ہیں

 

یہ نگارش اپنے دوست احباب سے شریک کیجیے

اشتہارات

لُطفِ سُخن کچھ اس سے زیادہ