اردوئے معلیٰ

Search

جن پر تری نگاہ پڑی وہ سنور گئے

جن سے تری نگاہ پھری وہ بکھر گئے

 

اس دور پر ملال میں آئے گی کیا ہنسی

خنداں لبی کے یار زمانے گذر گئے

 

منزل تمام عمر نہیں مل سکی انہیں

رستے میں پا کے چھاؤں کہیں جو ٹھہر گئے

 

آلامِ زندگی میں مزہ زندگی کا ہے

وہ کیا جیئیں گے جو غمِ دوراں سے ڈر گئے

 

خودداری و ضمیر و وفا جن کی مر گئی

وہ لوگ اپنی موت سے پہلے ہی مر گئے

 

آشفتگانِ عشق کا عالم نہ پوچھیے

نکلے تری طلب میں تو واپس نہ گھر گئے

 

دونوں جہاں میں ہیں وہی سرخرو اثر

دارو رسن سے ہنستے ہوئے جو گذر گئے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ