اردوئے معلیٰ

Search

جو عیسیٰ کی بشارت’ فخرِ آدم ہے سلام اُس پر

وہی جو باعثِ تکوینِ عالم ہے سلام اُس پر

 

فضیلت جس کی نبیوں پر مسلمّ ہے سلام اُس پر

جو آخر ہے مگر سب پر مقدّم ہے سلام اُس پر

 

وہ جس سے استوار ہر ربطِ باہم ہے سلام اُس پر

وہ جس سے دو جہاں میں امن قائم ہے سلام اُس پر

 

وہ جس کے دل میں ہر انسان کا غم ہے سلام اُس پر

وہ جس کی آنکھ اُمّت کے لئے نم ہے سلام اُس پر

 

دو عالم کے لئے رحمت ہی رحمت ہے وجود اُس کا

وہ جس کا ذکر بھی مونس ہے’ ہمدم ہے سلام اُس پر

 

وہ اپنوں اور غیروں پر کرم جس کا برابر ہے

وہ جو معیارِ اخلاقِ مکرّم ہے سلام اُس پر

 

کشش سارے زمانہ کے لئے جس کی اداؤں میں

وہ جس کے سنگِ در پر ہر جبیں خم ہے سلام اُس پر

 

وہ جو احمد بھی ہے محمود بھی ہے اور محمد بھی

وہ جس کی جس قدر مدحت کریں کم ہے سلام اُس پر

 

اُسی کا ہے کرم اُس کی ہی نسبت کا تقاضہ ہے

لبِ عارف پہ اس طرح جو پیہم ہے سلام اُس پر

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ