خود ہی خدائے پاک ہے شیدا رسول کا
کیا لکھ سکے گا کوئی قصیدا رسول کا
دل آئینہ ہے ، روح کو نسبت نبی سے ہے
آںکھیں ہیں میری اور اُجالا رسول کا
تخلیقِ دو جہاں ہے اسی کے طفیل میں
یہ ساری کائنات ہے صدقہ رسول کا
سب کے لیے ہو علم برابر ہوں سارے لوگ
یہ درس دے رہا ہے مدینہ رسول کا
انسانیت کو صرف مساوات چاہیے
اعلان کر رہا ہے یہ مکہ رسول کا
اخلاقِ مصطفیٰ کی حکومت دلوں پہ ہے
چلتا ہے سارے دہر میں سکہ رسول کا
تفریقِ رنگ و نام و نسب ہے فضول سب
یہ کہہ رہا ہے آخری خطبہ رسول کا
