خوشاکہ دل کی ہے بس ایک ہی طلب شب و روز
بسر ہوں کاش مدینے میں میرے اب شب و روز
قبائے اُسوۂ سرکار جب ملے گی تجھے
بہار زیست کی دکھلا سکیں گے تب شب و روز
خیال طوفِ مدینہ پہ جب ہوا مائل
شمیم یاد کی دینے لگے عجب شب و روز
دل و نگاہ کو پاکیزگی کی بھیک ملے
تو ہے یقین بنیں زر نگار سب شب و روز
ہوں خواب میں جو مُیسر تجلیّاتِ نبی
سکھائیں زیست کو ممکن ہے کچھ ادب شب و روز
یہ اِک علامتِ تقریبِ حاضری ہے کہ ہیں
اِک اضطراب سے دوچار بے سبب شب و روز
بس اِک سوال دلِ ناصبور کرتا ہے
نصیب ہوں گے مجھے حاضری کے کب شب و روز
سبق کتابِ الٰہی کا گر عمل میں ڈھلے
دکھائیں سیرتِ اطہر کی تاب و تب شب و روز
حضور ! خاص عنایات کی ضرورت ہے
رواج پاتا ہے کردارِ بولہب شب و روز
سلام عرض کروں جب درِ رسول پہ میں
تو حاضری کا بنے مستقل سبب شب و روز
بھلا چکی ہے جو اُمت پیامِ ختمِ رسل
ہوئے ہیں تیرگیوں سے مثالِ شب، شب و روز
یقیں ہے آج بھی کامل ہو اتباعِ نبی
تو ہاتھ باندھ کے حاضر ہوں با ادب شب و روز
جو لوگ ذکرِ رسالت مآب کرتے ہیں
فرشتے چومنے لگتے ہیں اُن کے لب شب و روز
مثال غیروں کی رکھتی ہے سامنے اُمت
زوال دیکھ رہی ہے اِسی سبب شب و روز
جھلک رہی ہیں جو کیفیتیں سخن میں عزیزؔ!
بنا دے حال وہی کاش میرا رب شب و روز
