اردوئے معلیٰ

Search

ذکرِ خیر الانام ہو جائے

عمر یونہی تمام ہو جائے

 

لب پہ صلِ علیٰ رہے ہر دم

یہ ہی عادت مدام ہو جائے

 

جس سے آتی ہو خوشبوئے حسّاں

کاش ایسا کلام ہو جائے

 

مشکبو ہوں تخیلات مرے

نعت لکھنے سے کام ہو جائے

 

سر پہ رکھ لوں جو نعلِ پاکِ نبی

تاج داروں میں نام ہو جائے

 

آتے جاتے رہیں مدینے ہم

ایسا کچھ انتظام ہو جائے

 

ناز ہو حاضری مواجہہ پر

اور درود و سلام ہو جائے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ