اردوئے معلیٰ

Search

روشنی ہی روشنی ہے آمدِ سرکار ہے

چار سو چھائی خوشی ہے آمدِ سرکار ہے

 

گنگناتی ہیں ہوائیں ، محوِ رقصاں ہے فضا

آب و گل میں تازگی ہے آمدِ سرکار ہے

 

آسمانوں کے ملائک بھی زمیں پر جلوہ گر

جستجو میں زندگی ہے آمدِ سرکار ہے

 

آمنہ بی ، بی کے گھر میں جشن ہے میلاد کا

نور کی محفل سجی ہے آمدِ سرکار ہے

 

کہہ رہے ہیں انبیاء و مرسلیں سب مرحبا!

بندگی ہی بندگی ہے آمدِ سرکار ہے

 

برلبِ کون و مکاں ہے الصلٰوۃ والسلام

ساری خلقت جھومتی ہے آمدِ سرکار ہے

 

ظلمتوں کی بدلیاں سب آسماں سے چھٹ گئیں

ہر طرف اب روشنی ہے آمدِ سرکار ہے

 

غم کے مارو ، بے سہارو آؤ مکے کو چلیں

آشتی ہی آشتی ہے آمدِ سرکار ہے

 

اے رضاؔ سارے نظاروں میں عجب ہے دلکشی

رُت نئی ، کیا بے خودی ہے آمدِ سرکار ہے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ