اردوئے معلیٰ

Search

زخم ، بھر بھی جائے توکتنا فرق پڑتا ہے؟

قتل کر بھی جائے توکتنا فرق پڑتا ہے؟

 

عشق کو خفا کر کے ، چاند سی حسیں دلہن

بن سنور بھی جائے تو، کتنا فرق پڑتا ہے؟

 

منتظر کوئی ناں ہو، تو سویر کا بھولا

شام گھر بھی جائے توکتنا فرق پڑتا ہے؟

 

پونچھنا نہ ہو جس کو، پُوچھنا نہ ہو جس کو

آنکھ بھر بھی جائے تو کتنا فرق پڑتا ہے؟

 

دل کے آستانے پر پرُ غرور پیشانی

کوئی دھر بھی جائے تو کتنا فرق پڑتا ہے؟

 

ایک عام انساں میں، ایک عام انساں تو

ایک مر بھی جائے تو کتنا فرق پڑتا ہے؟

 

تیری آنکھ میں مجھ کو لوگ ڈھونڈ لیتے ہیں

تو مکر بھی جائے تو کتنا فرق پڑتا ہے؟

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ