اردوئے معلیٰ

سلام اس پر جو ہے جمالِ دوامِ ہستی

سلام اس پر جو ہے جمالِ دوامِ ہستی

سلام اس پر ہے جس سے روشن مقام ہستی

 

سلام اس پر جواں بہارِ عدن ہے جس سے

سلام اس پر رواں ہے جس سے نظامِ ہستی

 

سلام اس پر زمیں ہے جس سے پیامِ جنت

سلام اس پر حسیں ہے جس سے سلامِ ہستی

 

سلام اس پر ہے تمکنت جس سے کارواں میں

سلام اس پر ہے جس سے حسنِ خرامِ ہستی

 

سلام اس پر کہ جس نے بخشا طریقِ عرفاں

سلام اس پر کہ جس سے ہے احترامِ ہستی

 

درود اُس پر سلام جس کا نویدِ رحمت

سلام اس پر درود جس کا پیامِ ہستی

 

سلام اُس پر جو شان ہے رازِ لامکانی

سلام اس پر جو ارمغاں ہے بنامِ ہستی

 

سلام اس پر کہ جو ستونِ سلامتی ہے

وجود سے جس کے ہے وقارِ قیامِ ہستی

 

سلام اس تاجدارِ خوباں پہ جس کی خاطر

بصد محبت کیا گیا اہتمامِ ہستی

یہ نگارش اپنے دوست احباب سے شریک کیجیے

اشتہارات

لُطفِ سُخن کچھ اس سے زیادہ