اردوئے معلیٰ

Search

شانِ محبوبِ رحمان کیا خوب ہے

پایا دیدارِ سبحان کیا خوب ہے

 

حق نے فرمایا جس کو ہے لاریب فیہ

اُن پہ اُترا وہ قرآن کیا خوب ہے

 

اُن کی ہر اک ادا واہ وا واہ وا

اُن کا ہر ایک فرمان کیا خوب ہے

 

رب نے بھیجا فرشتوں کی افواج کو

بدر میں دیکھو میدان کیا خوب ہے

 

مُژدہْ امن جاری کیا آپ نے

خوں کے پیاسوں پہ احسان کیا خوب ہے

 

اُن کے پہلو میں صدیق و فاروق ہیں

زیرِ گُنبد شبستان کیا خوب ہے

 

خاک ہو جاؤں طیبہ کی میں خاک میں

ہو اگر اِس کا امکان کیا خوب ہے

 

اُن کے لُطف و کرم سے بندھا قافیہ

نظمِ مرزا کا عُنوان کیا خوب ہے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ