اردوئے معلیٰ

Search
نعت کہنا بڑی خوش بختی دی نشانی اے۔ اوہ شاعر بڑا خوش قسمت اے جیہنوں اللہ تعالیٰ نعت لکھن تے پڑھن دی توفیق عطا کردا اے۔ اجیہے شاعراں وچ جناب عبدالمجید صابری دا ناں وی شامل اے۔
شاعر موصوف دی نعتیہ شاعری پڑھ کے فوراً پتہ چل جاندا اے کہ اوہناں دے دل وچ حضور سرو رِ کائنات صلی اللہ علیہ و آلہٖ وسلم دی محبت کُٹ کُٹ کے بھری ہوئی اے۔ ایہو ای وجہ اے کہ اوہناں دے نعتیہ کلام وچ حضور نال عشق و محبت دے جذبے بہت اُگھڑ کے سامنے آؤندے نیں۔ آپ اردو تے پنجابی دے بڑے معروف تے سُچے شاعر نیں۔ ایہدے نال نال اوہ محقق، دانشور تے نثر نگار وی نیں۔
تصوّف نال وی اوہناں دا گہرا تعلق اے۔ صابری صاحب دی نعت نگاری وچ بہت ساریاں خوبیاں پائیاں جاندیاں نیں۔ اوہناں عروض دی پابندی وی کیتی اے تے سوچ دی اُچی اڈاری وی وکھائی اے۔ زبان بڑی سادہ تے عام فہم استعمال کیتی اے۔ جیہڑی کہ چنگی شاعری دی علامت سمجھی جاندی اے۔ ونگی دے طور تے اوہناں دے کجھ نعتیہ شعر ویکھو:
——
اک بھیت ہے اس دے بولن دا
وکھرا ای رنگ ہے ڈھولن دا
پیمانہ عقلاں کول نئیں
اوہدی اک اک گل نوں تولن دا
امانتاں دا امین اوہ اے
صداقتاں دا یقین اوہ اے
اداواں آئیتاں اُس دیاں نیں
اصل کتاب مبین اوہ اے
——
میں چاہت دا سودا کھرا کر لیا اے
محمد نوں ہی دلربا کر لیا اے
میں ایناں کو رویا ہجر دا ہاں رونا
ہن اوہناں نے ہی رابطہ کر لیا اے
——
مثنوی سیرت نبوی، معراج العاشقین، میلاد تے لکھیا کلام شاعر دی محبت نبوی نوں ظاہر کردا اے۔ بے شک صابری صاحب دا ایہہ نعتیہ پراگا پنجابی ادب وچ اک خوبصورت اضافہ اے، جیہدے نال اوہناں دی عاقبت وی بہتر ہووے گی تے ایہہ کلام علمی تے اد بی حلقیاں وچ پسند وی کیتا جاوے گا۔
ان شاء اللہ
——
ایں سعادت بزورِ بازو نیست
تا نہ بخشند خدائے بخشندہ
یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ