اردوئے معلیٰ

Search

محمد مصطفیٰ کا آستاں ہے

مدینے میں بہار بے خزاں ہے

 

زمیں جیسے سمٹ کر رہ گئی ہے

مرے سر پر مکمل آسماں ہے

 

محمد مصطفیٰ کا نامِ نامی

سماعت زا ہے اور تنویرِ جاں ہے

 

بہ جز یزداں، محمد کے علاوہ

کوئی رحمت میں اتنا بے کراں ہے؟

 

اولو الابصار اس پر متفق ہیں

محمد ہی تو سرِ کُن فکاں ہے

 

محمد مصطفیٰ اُنظُر اِلَینا

وجودِ رُوحِ اُمّت خُوں چکاں ہے

 

ہماری بے بسی بے چارگی اب

ہمارے ضعفِ دیں کی ترجماں ہے

 

شدائد موسموں کے کھا رہے ہیں

نہ طاقت ہے نہ سر پر سائباں ہے

 

دلِ گستاخ پر یہ لگ رہا ہے

فضائے علم و حکمت بدگماں ہے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ