اردوئے معلیٰ

Search

 

(سلام)

 

مخزنِ آیاتِ قرآں الصلوٰۃ والسلام

شانِ والا شانِ رحماں الصلوٰۃ والسلام

 

ایک اِک دھڑکن پہ سو سو رحمتوں کا ہو نزول

دل سے دُھرائے جو انساں الصلوٰۃ والسلام

 

اہل ایماں کے لیے، اہل عقیدت کے لیے

آفتابِ علم و عرفاں الصلوٰۃ والسلام

 

غنچہ و گل کی چمن میں کچھ حقیقت ہی نہیں

کہتا ہے جوشِ بہاراں الصلوٰۃ والسلام

 

رحمتیں منہ چوم لیتی ہیں خود اس کا دوڑ کر

جو کہے اے شاہِ شاہاں الصلوٰۃ والسلام

 

جب کہیں کچھ بھی نہ ہوگا ذات واحد کے سوا

خودبخود ہوگا نمایاں الصلوٰۃ والسلام

 

بزمِ ہستی میں اُتر آئیں فرشتوں کی صفیں

واقعی ہے جانِ جاناں الصلوٰۃ والسلام

 

کربلا میں کہہ رہا تھا ہر مَلک رو کر صبیحؔ

شاہدِ شاہِ شہیداں الصلوٰۃ والسلام

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ