اردوئے معلیٰ

Search

 

ملی ہے محبت حضور آپ کی

بڑی ہے عنایت حضور آپ کی

 

سبھی کے لبوں پر ہے نام آپ کا

سبھی کو ہے چاہت حضور آپ کی

 

وہی ہے معزز ہمارے لیے

جو کرتا ہے عزت حضور آپ کی

 

دُعا جب بھی مانگی ہے معبود سے

تو مانگی ہے قربت حضور آپ کی

 

خدا کے سوا کوئی سمجھا نہیں

ہے مخفی حقیقت حضور آپ کی

 

محبت ہے ماں باپ سے بھی مگر

مقدم محبت حضور آپ کی

 

کرم اور کیا ہو خطا کار پر

ملے گی شفاعت حضور آپ کی

 

عطا بے بہا، جود بے انتہا

کرم کی ہے عادت حضور آپ کی

 

ابوبکرؓ و عثمانؓ و حیدرؓ ہوئے

ملی جن کو صحبت حضور آپ کی

 

ہمیں بھی حضوری کا موقع ملے

اگر ہو عنایت حضور آپ کی

 

غریبوں یتیموں کے دن پھر گئے

ملی جب محبت حضور آپ کی

 

عطا کم نہیں ہے یہ اشفاقؔ پر

یہ کرتا ہے مدحت حضور آپ کی

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ