اردوئے معلیٰ

Search

میں بھی کسی کے درد کا درمان بن گیا

ادنیٰ سا آدمی تھا میں انسان بن گیا

 

اپنی حدیں ملی ہیں تو ادراکِ حق ہوا

عرفانِ ذات باعثِ ایمان بن گیا

 

ہمسر تھا جبرئیل کا جب تک تھا سجدہ ریز

جیسے ہی سر اٹھایا تو شیطان بن گیا

 

خیراتِ عشق کیا پڑی کشکولِ ذات میں

اتنے کھلے گلاب کہ گلدان بن گیا

 

کچھ بھی نہیں تھا کہنے کو شہر وصال میں

ہجرت ملی غزل کو تو دیوان بن گیا

 

پہچانیے مجھے میں وہی ہوں ظہیرؔ، جو

خود کو مٹا کر آپ کی پہچان بن گیا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ