اردوئے معلیٰ

Search

(جواب چٹھی) معراج العاشقین (حصہ دوم)

 

نبی پاک دا کراں دیدار، لگے

جویں رب دی شان مبین ویکھاں

 

متھے چمکدی نور دی لاٹ پئی

لباں اُتے قرآن تے دین ویکھاں

 

اوہدی اکھ معراج ’’مازاغ‘‘ والی

اوہدے دنداں دی لڑی یٰسین ویکھاں

 

اوہدی زلف ’’ واللیل‘‘ دے چھلیاں وچ

پھسے ہوئے کئیں نازنین ویکھاں

 

اوہدی لُٹ اداواں نے لئے عاشق

اوہنوں حُسن دا حق الیقین ویکھاں

 

بُجھے ہوئے نیں سارے ای اوس اگے

کیہڑا ہور میں فیر حسین ویکھاں

 

اوہدی اکھ دے اِک اشارے اُتے

میں بدل دے ربی آئین ویکھاں

 

جیہڑا لامکاں دی سیر کرے

اوہنوں روضے دے وچ مکین ویکھاں

 

انّھی اکھ نہ اوس نوں ویکھ سکے

میں اوس دا کھان تے پین ویکھاں

 

میرے دل دی گل اوہ جان لیندا

ایڈے اوس دے کنّ مہین ویکھاں

 

جتھے چاہوے اوہ لا دربار لیندا

وڈی شاہی دے اوس دے سین ویکھاں

 

چارے یار نیں اوس دے تخت اُتے

نال اوس نوں تخت نشین ویکھاں

 

سِراں اُتے نیں اوہناں دے تاج سوہنے

سج بن کے بیٹھے حسین ویکھاں

 

اوہدے اک صحابیؓ دے نام کولوں

پراں جاندا شیطان لعین ویکھاں

 

اوہؓ تے کنڈے پرو کے ٹاٹ پاندے

اوہدے ایہو جئے جانشین ویکھاں

 

جنہاں منیاں نبی دا بھائی چارا

اوہ صحابہؓ نوں آفرین ویکھاں

 

تھلے وضو دا پانی نہ ڈگن دیندے

حُب نبی اندر بہترین ویکھاں

 

جیہدی دُھم ہے عرش تے فرش اُتے

اوہ مجیدؔ میں صادق امین ویکھاں

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ