جتنا دیا سرکار نے مجھ کو اتنی مری اوقات نہیں
یہ تو کرم ہے ان کا ورنہ مجھ میں تو ایسی بات نہیں
تو بھی وہیں پہ جا جس در پہ سب کی بگڑی بنتی ہے
ایک تیری تقدیر بنانا ان کے لیے کچھ بات نہیں
عشق شہ بطحا سے پہلے مفلس و خستہ حال تھا میں
نام محمد کے قرباں اب وہ مرے حالات نہیں
ذکر نبی میں جو دن گزرے وہ دن سب سے بہتر ہے
یاد نبی میں رات جو گزرے اس سے بہتر رات نہیں
غور تو کر سرکار کی تجھ پر کیسی خاص عنایت ہے
کوثرؔ تو ہے ان کا ثناء خواں یہ معمولی بات نہیں
