اردوئے معلیٰ

Search

اب شبِ غم اگر نہیں نہ سہی

دامنِ برگ تر نہیں نہ سہی

 

زندہ دارانِ شب کو میری طرح

انتظارِ سحر نہیں نہ سہی

 

دشت پیما کے آس پاس اگر

کوئی دیوار و در نہیں نہ سہی

 

عام ہے جستجوئے جہلِ خرد

شہر میں دیدہ ور نہیں نہ سہی

 

ہر نفس ایک تازیانہ ہے

آہ میں کچھ اثر نہیں نہ سہی

 

موت ہے مستقل تعاقب میں

زندگی خود نگر نہیں نہ سہی

 

سر اٹھا کر زمیں پہ چلتا ہوں

سر چھپانے کو گھر نہیں نہ سہی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ