اردوئے معلیٰ

Search

اللہ اللہ کیا سفر کیا روح پرور خواب تھا

فرشِ ریگِ راہِ طیبہ بسترِ سنجاب تھا

 

نطقِ جاں شیرینیء مدحت سے لذت یاب تھا

یہ کتابِ زندگی کا اک درخشاں باب تھا

 

ارضِ طیبہ پر قدم تو کیا ، نظر جمتی نہ تھی

"​ذرہ ذرہ روکشِ خورشیدِ عالم تاب تھا "​

 

بن گیا اشکِ ندامت میری بخشش کا سبب

بربطِ امید کب سے تشنہء مضراب تھا

 

صبح کا تارا حضوری کا پیامی بن گیا

رات ہجرِ مصطفےٰ میں دل بہت بیتاب تھا

 

آنکھ بیتابِ نظارا تھی نہ دل تھا مضطرب

اُن کے در پر ہر کوئی شائستہء آداب تھا

 

اللہ اللہ روبرو ہے گنبدِ خضرا ایاز

بن گیا عینِ حقیقت جو نظر کا خواب تھا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ