اے میرِ اُمم اے جانِ طلب اے شاہِ عربؐ

سب سے ارفع تراؐ نام و نسب اے شاہِ عربؐ

قربان ہوں تجھؐ پر جد و اب اے شاہِ عربؐ

ہوا علم عطا ہر چھوٹا بڑا مخفی اخفا

توؐ شہرِ علم، ہے اُمی لقب، اے شاہِ عربؐ

توؐ شاہد ہے، توؐ حامد ہے، تریؐ آمد ہے

قریہ قریہ ہے جشنِ طرب اے شاہِ عربؐ

کوئی مشرق میں کوئی مغرب میں کوئی پچھم میں

عشاق ہیں تیرےؐ سب کے سب اے شاہِ عربؐ

اے عرش نشیںؐ، اے مہرِ جبیںؐ ، طیبہ کے مکیںؐ

مجھے اِذنِ حضوری ہو گا کب؟ اے شاہِ عربؐ

تن بے کل ہو ، من گھایل ہو ، کوئی مشکل ہو

امداد تریؐ کرتے ہیں طلب اے شاہِ عربؐ

دستک دینا ، دھیرے کہنا ، بول ’’اُنظرنا‘‘

قرآں نے سکھایا تیراؐ ادب اے شاہِ عربؐ

سائل ہوں تراؐ ، دیدار عطا ، کر بہر خدا

ہو جائے کرم اشفاقؔ پہ اب اے شاہِ عربؐ