اے قاسمِ عطائے احد ! کیجیے مدد !
امت کو آن پہنچے رسد ! کیجیے مدد !
اے منظرِ جمالِ خدا ! دور ہو بلا !
اے مظہرِ جلالِ صَمَد ! کیجیے مدد
اے حامی و انیسِ غریباں ! نگاہِ لطف !
اب ظلم ہیں ورائے عدد کیجیے مدد
آقائے خضر ! عشق کو آبِ بقا مِلے !
ہو فسق اب سپردِ لحد ! کیجیے مدد
حالِ تباہ آپ سے کب ہے چھپا ہوا
اے منبعِ علوم و خرد ! کیجیے مدد !
دیں کی محافظت کے بجائے کچھ اہل علم
آپس میں کررہے ہیں حسد ، کیجیے مدد !
دستِ عدو سے آپ کے عشاق کا حضور !
ہوتا ہے اب تو قتلِ عمد کیجیے مدد !
فردوس میں جوار معظم کو چاہیے
اپنی رضا کی دے کے سند ! کیجیے مدد !
