بابِ شاہِ عرب ہے چلے آئیے
یہ جھجک بے سبب ہے چلے آئیے
پَرفشاں ہے یہاں رحمتِ کرِدگار
جو بھی دل میں طلب ہے چلے آئیے
رحمت و عافیت دلکشی بخششیں
یاں انوکھی ہی چھب ہے چلے آئیے
کہہ رہی ہے فضائے حرم مرحبا
تم پہ احسانِ رب ہے چلے آئیے
یاد کرکے گناہوں کو کیوں رُک گئے
دِل اگر بااَدب ہے چلے آئیے
گھر بلایا ہے تم کو کریں گے عطا
اِن کا ارفع نسب ہے چلے آئیے
اے مجسم خطا پیکرِ معصیت
بند انعام کب ہے چلے آئیے
ہو عنایت شکیلِؔ خزیں پر شہا
اب تو یہ جاں بلب ہے چلے آئیے
