اردوئے معلیٰ

Search

 

بے چین ہوں مدت سے مجھے چین عطا ہو

بس ایک جھلک سیدِ کونین عطا ہو

 

اے بحرِ عطا بحرِ کرم بحرِ عنایت

دو بوند مجھے صدقہء حسنینؓ عطا ہو

 

اک بار ہو پھر پیشِ نظر گنبدِ خضریٰ

اک بار زیارت شہِ حرمین عطا ہو

 

دُھل جائے سیاہی مرے اس قلبِ سیہ کی

اشکوں کا سمندر مجھے فی العین عطا ہو

 

گھیرا ہے اندھیروں نے مرے گھر کو ازل سے

تھوڑی سی ضیاء سرور ثقلین عطا ہو

 

محور ہوں اگر سوچ کا سرکارِ دو عالم

سوچوں کو سر افرازیِ قوسین عطا ہو

 

آقا کی محبت میں گذر جائیں شب و روز

اشفاقؔ کو وہ دولتِ دارین عطا ہو

 

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ