اردوئے معلیٰ

Search

كُنْتُ كَنْزًا حسن کا شوقِ شہود
تھی پسِ پردہ تمنائے نمود
کنت کنزاً صوفیاء اکرام کے ہاں روایت کردہ ایک حدیث کی طرف اشارہ ہے کہ اللہ پاک نے فرمایا کہ وہ ایک چھپا ہوا خزانہ تھا اور اس نے چاہا کہ اسے جانا جائے

جاودانی حسن کا اظہار ہو
دید کی خاطر نگاہِ یار ہو

نازِ دلبر کو اٹھانے کے لئے
سینۂِ ہستی جلانے کے لئے

ایک ایسا جوہرِ نایاب ہو
جلوۂِ حق سے نہ جو سیراب ہو

حُسن اپنی تاب کو جس رُو کرے
دیکھ کر اُس سمت وہ ھو ھو کرے

شوق تیرا گرمیِ محفل بنا
یوں موادِ شوق سے یہ دل بنا
(دل سے مراد حقیقتِ محمدیہ ہے)

حُسن نے خود کو کیا جب آشکار
اور نگاہِ دل ہوئی جب استوار

قلب کو شوقِ گرفتاری ہوا
قلب تیرے حسن پر واری ہوا

پھر جبینِ دل ہوئی محوِ سجود
عشق کو اس دم ملا پہلا وجود

اک زمانہ لَمْ يَكُنْ شَيْئًا رہا
کون جانے کس نے کس کو کیا کہا
(سورۃ الدہر کی پہلی آیتِ مبارکہ کی طرف اشارہ ہے)

یہ ادائے عشق کیوں گمنام ہو
حسن نے چاہا، تماشا عام ہو

پھر لیے فیضانِ نورِ لم یزل
نورِ اول چمکا اُس صبحِ ازل

نورِ اول پر ہوئی یہ واردات
نورِ اول سے بنی کُل کائنات

فصل
قَالُوا أَقْرَرْنَا میں مضمر ہے یہ راز
اس حقیقت میں نہیں کوئی مجاز
(اس میں انبیاء علیہم السلام کا اللہ پاک سے عہد لینے والی آیتِ مبارکہ کی طرف اشارہ ہے)

نائبِ حق آپ ہیں، یا مصطفیٰ
آپ کے نائب ہیں جملہ انبیاءؑ

اور تمام انجیل و توریت و زبور
اہتمامِ آمدِ دورِ حضور

فصل
عقل پر، وجدان پر قبضہ ترا
انفس و آفاق پر غلبہ ترا

علم پر، ادراک پر حاوی ہے تُو
ذاتِ حق کا معتبر راوی ہے تُو

ہادی و مہدی، امامِ انقلاب
عالمِ اُمّی لقب، اُمّ الکتاب

واہ شانِ رحمت و فضلِ عظیم
علم میں مَا لَمْ تَكُنْ تَعْلَم علیم
(سورۃ النساآیت 113 کی طرف اشارہ ہے)

گر جلائے عشقِ احمد کا چراغ
علم کے دامن میں ہو حق کا سراغ

فصل
جملہ خلق و کائناتِ گرد و آب
بحر میں تیرے ہیں اک ادنیٰ حباب

ہر گھڑی پیشِ أُولُو الْأَبْصَار تُو
پھر بھی ہے لَا تُدْرِكُ الْأَبْصَار تُو

فصل
ہجر کی وحشت سے دل بہنے لگے
تو صحابی آپ سے کہنے لگے

روزِ محشر خُلد میں یا مصطفیٰ
آپ ہونگے درمیانِ انبیاءؑ

پست ہیں اپنے مقامات آپ سے
ہو گی پھر کیونکر ملاقات آپ سے

عشق کی سمجھو انوکھی نفسیات
اس پریشانی میں مضمر تھی یہ بات

ریگ و صحرا میں اگرچہ ہیں مقیم
بزمِ احمد لاکھ جنٰت النعیم

جس بھی جنت میں تری سنگت نہیں
وہ نہیں جنت نہیں جنت نہیں

فصل
جو تجھے سمجھے جدا توحید سے
نے ملے اس کو خدا توحید سے

مست ہے وہ من گھڑت توحید میں
دم بدم ابلیس کی تقلید میں

سورتِ اخلاص ہے توحید کُل
پاسبانِ رازِ کُل توحید، قُل

محورِ ایماں نہ ہو گر تیری ذات
دین بھی، ایمان بھی لات و منات

یہ شریعت، یہ طریقت، لغویات
نے صلاۃ و نے زکوٰۃ و نے نجات

آپ کی سنت صراطِ مستقیم
سرکشی و بدعتیں راہِ جحیم

اس مکمل دین کا عنوان تُو
ایماں تو، اسلام تو، احسان تُو

جن میں ہے تیری اطاعت کا جنون
وہ ہیں مصداقِ وَلَا هُمْ يَحْزَنُونَ

متقی ہے جو، حضوری میں ہے گم
مظہرِ لَا تَرْفَعُوا أَصْوَاتَكُم
(سورۃ حجرات کی ابتدائی آیاتِ مبارکہ کی طرف اشارہ ہے)

فصل
ہر مقام و حال سے اعلیٰ ہے تُو
جملہ قیل و قال سے بالا ہے تُو

سب قیاسات و دلائل ہیں حجاب
کیا ہے تُو؟ واللہ اعلم بالصواب

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ