اردوئے معلیٰ

Search

حمد و ثنا سے پہلے زباں پاک کیجیے

بعد اسکے ذکر صاحب لولاک کیجیے

 

دل میں چھپا کے جذبۂ عشق رسول پاک

جان و جگر کو اپنے طربناک کیجیے

 

مشغول ہو زبان درود و سلام میں

یوں دستیاب روح کی خوراک کیجیے

 

یادوں کا اپنی دے کے اجالا مرے حضور

سینے سے ظلمتوں کا جگر چاک کیجیے

 

کیجے بیاں جو گنبد خضریٰ کی رفعتیں

پھر کیا بیان رفعت افلاک کیجیے

 

ہو جسکی ٹھوکروں میں جہاں بھر کی سروری

اسکا خیال بستر و پوشاک کیجیے

 

عشاق مصطفےٰ کے سدا چومیے قدم

انکے عدو پہ رخ کو غضب ناک کیجیے

 

لکھ دیجیے کفن پہ غلام رسول پاک

پھر اس کے بعد مجھ کو تہ خاک کیجیے

 

جو بحر معرفت کی سکھا دے شناوری

آقا عطا مجھے بھی وہ تیراک کیجیے

 

آؤں حریم ناز میں جب چاہوں میں حضور

ایسے عروج پر مرا ادراک کیجیے

 

صد شکر نورؔ ہم ہیں فقیر در رسول

کیا خاک طمع دولت و املاک کیجیے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ