اردوئے معلیٰ

Search

شاہِ جوانانِ خلُد، بادشہِ مشرقَین

لختِ دلِ مُصطفٰے یعنی ھمارے حُسَین

اُن کا مکمل وجُود نُورِ نبی کی نمُود

اُن کا سراپا تمام عشقِ حقیقی کی عَین

ماں ھیں جنابِ بتُول، بنتِ رسولِ کریم

باپ ھیں شیرِ خُدا، فاتحِ بدر و حُنَین

 

اُن کا امَر مُعجزہ سوز و غمِ کربلا

آج بھی ھے گریہ ناک چشمِ نمِ کربلا

 

اصلِ سخا، عینِ حق، رُوحِ وفا، جانِ عشق

اسمِ امامِ حُسَین چشمۂ فیضانِ عشق

فیض تو دیکھو ذرا نسبتِ مولائی کا

بن گئے اُن کے غُلام خاصۂ خاصانِ عشق

جن کو نہیں مل سکی جائے اماں کوئی بھی

پہنچے درِ شاہ پر ھوگئے مہمانِ عشق

 

مرجعِ عُشّاق ھے آپ کا در، یا حُسَین

فارسِ خستہ پہ بھی ایک نظر، یاحُسَین

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ