اردوئے معلیٰ

Search

خواہشِ دل سے ماورا بھی مانگ

خود سے ہو کر ذرا جُدا بھی مانگ

 

درگہِ قاسمِ تمام ہے یہ

خُلق بھی ، خَلق بھی ، خُدا بھی مانگ

 

بے نہایت کرم نواز ہیں وہ

حدِ مطلوب سے سوا بھی مانگ

 

جن سے خیراتِ لطف مانگی ہے

اُن سے گُنجائشِ عطا بھی مانگ

 

مالکِ کُل خیار ہیں آقا

اُن سے ہی آب بھی ہَوا بھی مانگ

 

نُطق بے صوت سے درود بھی پڑھ

کلکِ بے حرف سے ثنا بھی مانگ

 

سبز گنبد پہ رکھ نظر اپنی

زلہ رزقِ خاکِ پا بھی مانگ

 

جس رضا پر ہے منحصر بخشش

اے رضا خواہ ! وہ رضا بھی مانگ

 

مانگ اُن سے متاعِ سوز و گداز

حاصلِ دردِ لا دوا بھی مانگ

 

معصیت کے نشیب میں مقصودؔ

دستِ رحمت کا آسرا بھی مانگ

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ