دلیلِ نعت کہاں ارتکازِ حرف و صورت
سپردِ عجز ہے تابِ نیازِ حرف و صورت
ورائے سدرۂ تخییل ہے ثنائے شوق
خجل ہے جس سے ہر اک امتیازِ حرف و صورت
تری طلب میں کہیں گم ہے میرا جذبِ دروں
ترا خیال ہے میری نمازِ حرف و صورت
بیاں کی شعلگی خاکسترِ سکوتِ مآل
ہوئے ہیں صَرفِ ثنا سوز و سازِ حرف و صورت
ضیا نواز ہو بامِ سخن پہ اسمِ کرم
یہی ہے معنیٰ و منشائے رازِ حرف و صورت
سخن نہیں ہے ، ثنا کی ہے یہ فضائے دروں
ہے پَر بریدہ یہاں شاہبازِ حرف و صورت
مجھے بھی درگہِ مدحت کی چاکری ہو نصیب
مجھے بھی اذن ہو عزت نوازِ حرف و صورت
پریدہ رنگ ، سبھی مدعئ مدحِ شرَف
نشیب رُو ، ترے آگے فرازِ حرف و صورت
اُنہی کی مدح سے ملنا ہے گوہرِ مقصودؔ
رہے اُنہی کی ثنا ہی جوازِ حرف و صورت