اردوئے معلیٰ

Search

رِیاضِ جناں ہے نثارِ مدینہ​

بڑے جوش پر ہے بہارِ مدینہ​

 

مجھے چھو بھی سکتی ہے نارِ جہنم؟​

کہ مجھ پر پڑا ہے غبارِ مدینہ​

 

نہ بیٹھا کہیں اور جز عرشِ اعظم​

جب اٹھا ہوا سے غبارِ مدینہ​

 

نہیں بھولتا روضۂ پاکِ احمد​

یہ ہم لائے ہیں یادگارِ مدینہ​

 

جو بیچے گلستانِ فردوسِ رضواں​

ابھی مول لیتے ہیں خارِ مدینہ​

 

کہوں کیوں نہ رگہائے گلہائے جنت​

کہ پھولوں میں تلتے ہیں خارِ مدینہ​

 

جو ہے نور دن میں وہی نور شب کو​

برابر ہیں لیل و نہارِ مدینہ​

 

بھلا کیا مرے آگے صحرائے محشر​

پھرا ہوں میانِ دیارِ مدینہ​

 

بناتے ہیں جاروب پرہائے قدسی​

جو ہیں خاکروبِ دیارِ مدینہ​

 

بڑا عیب ہے اے خضر کوچہ گردی​

کہاں تم کہاں سبزہ زارِ مدینہ​

 

جو گلہائے باغِ جناں کوئی توڑے​

تو آواز آئے نثارِ مدینہ​

 

ہیں آٹھوں بہشتوں کے مختار و مالک​

نہال و گل و برگ و بارِ مدینہ​

 

یہ ہے پستیِ چرخِ اخضر نظر میں​

جھکاتا ہے سر سبزہ زارِ مدینہ​

 

وہاں کی زمیں کا تصور ہے دل میں​

گرہ میں بندھا ہے غبارِ مدینہ​

 

خضر کی دعا ہے کہ اے ابرِ رحمت​

ملے رتبۂ سبزہ زارِ مدینہ​

 

پکاروں گا برگِ خزاں کی طرح سے​

خبر لو مری گلعذارِ مدینہ​

 

کہاں ہم کہاں اب وہ دن اے تعشق​

کبھی تھے میانِ دیارِ مدینہ​

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ