اردوئے معلیٰ

Search

ماہِ صدق و صفا کی حسیں روشنی

جس کے ماتھے کا جھومر صداقت بنی

 

رسمِ تصدیق جس کے پدر سے چلی

جس کو ورثے میں تسلیم کی خو ملی

 

چاندنی جس کی رویت سے شرما گئی

میری ماں! عائشہؓ علم کی منتہی

 

دیں میں جس کی اُمومت سے جاں پڑ گئی

راویوں میں ہمیشہ نمایاں وہی!

 

جس نے پھیلائی خوشبو احادیث کی

اور بخشی شبوں کو عجب روشنی

 

جس نے اوصافِ مہرِ رسالت سبھی

پیشِ اُمت رکھے، تھے خفی یا جلی

 

تا کہ ہو اُسوۂِ پاک کی پیروی

اِتِّباعِ نبی ہی کرے ہر گھڑی

 

کوئی نادار ہو اُمتی یا غنی

ایسی ماں جس کی سیرت مثالی رہی!

 

جس کی عزت امر عظمتیں دائمی!

جس کے صدقے تیمم کی رخصت ملی

 

جس کی عفت کی رب نے گواہی بھی دی!

ساری اُمت کی ماؤں میں جو فرد تھی

 

جس کو نسواں پہ حاصل ہوئی برتری

اہلِ بیتِ مطہر میں ممتاز بھی

 

زوجۂ پاکِ مُزّمِّل و اَبطحی

’’بنتِ صدیقؓ، آرامِ جانِ نبی

اس حریمِ برأت پہ لاکھوں سلام‘‘

 

زوجۂ پاکِ مُزّمِّل و ابطحی
(اعلیٰ حضرت احمد رضا خانؒ بریلوی کے ایک بیت کی تضمین)
یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ