اردوئے معلیٰ

Search

سب سے اولیٰ و اعلیٰ ہمارا نبی

سب سے بالا و والا ہمارا نبی

 

اپنے مولیٰ کا پیارا ہمارا نبی

دونوں عالم کا دولھا ہمارا نبی

 

بزم آخر کا شمع فروزاں ہوا

نور اوّل کا جلوہ ہمارا نبی

 

سارے اچھوں میں اچھا سمجھے جسے

ہے اس اچھے سے اچھا ہمارا نبی

 

انبیا سے کروں عرض کیوں مالکو !

کیا نبی ہے تمھارا ہمارا نبی

 

جس نے ٹکڑے کیے ہیں قمر کے وہ ہے

نورِ وحدت کا ٹکڑا ہمارا نبی

 

سب چمک والے اُجلوں میں چمکا کیے

اندھے شیشوں میں چمکا ہمارا نبی

 

جس نے مُردہ دلوں کو دی عمر ابد

ہے وہ جانِ مسیحا ہمارا نبی

 

غمزدوں کو رضاؔ مژدہ دیجے کہ ہے

بے کسوں کا سہارا ہمارا نبی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ