مگر یہ بُعدِ مکانی بڑا عدو ہے مرا

نبی سے طِیبِ تکلم کی بھیک مانگتا ہوں

اِسی لیے سخنِ نعت مشک بو ہے مرا

اُمیدِ طیبہ رسی منہ نہ موڑنا مجھ سے

اندھیری رات میں واحد چراغ تو ہے مرا

میں خود ہی بے عملی سے ہوا ہوں دشمنِ جاں

جہاں میں اور کوئی شخص کب عدو ہے مرا

حضور ! حالِ دلِ مضطرب لکھوں کیسے

کہ پیرہن ہی خیالوں کا بے رفو ہے مرا

ہنر بھی خام ہے الفاظ بھی خزف ہیں مگر

حضور ! نالۂ دل بھی لہو لہو ہے مرا

یہ عہد لشکرِ شیطاں میں مجھ کو کھینچتا ہے

یقیں بہ فیضِ ثنا اب بھی سرخ رو ہے مرا

زمینِ طیبہ سے اے کاش کہہ سکوں احسنؔ!

کہ نیند میری سہی خواب صرف تو ہے مرا