ایک اک گوشہ مرے دل کا فروزاں ہو گیا

ان کی یادیں ان کی الفت ان کی رحمت پر نظر

کچھ تو میرے پاس بھی بخشش کا ساماں ہو گیا

عرش کے جلوے نظر آنے لگے ہیں فرش پر

جب سے وہ ماہِ نبوّت جلوہ ساماں ہو گیا

اے شہِ خوبانِ عالم تیرے جلوؤں کے طفیل

’’ذرّہ ذرّہ غیرتِ مہرِ درخشاں ہو گیا‘‘

مجھ سے بے مایہ پہ کچھ ایسا ہوا ان کا کرم

دیکھ کر سارا زمانہ مجھ کو حیراں ہو گیا

حاضری طیبہ کی میرے نام بھی لکھ دی گئی

مجھ سے کافی دور اب جنت کا ارماں ہو گیا

مطلعِ خورشیدِ ایماں ہو گیا سینہ مِرا

جلوہ گر دل میں مِرے وہ جانِ ایماں ہو گیا

نیرِ برجِ رسالت کی کرن جس پر پڑی

آسمانِ رشد کا وہ ماہِ تاباں ہو گیا

المدد یا مصطفیٰ جب کہہ کے میں گھر سے چلا

ان کی رحمت سے مِرا ہر کام آساں ہو گیا

اس کی تربت پر برستی ہیں خدا کی رحمتیں

عظمتِ شاہ مدینہ پر جو قرباں ہو گیا

صرف لکھنا ہے اُسے وصفِ رسولِ ہاشمی

اب قلم سے نورؔ کا یہ عہد و پیماں ہو گیا