اردوئے معلیٰ

Search

 

قلم ہاتھ میں لینا بعد میں پہلے دعا کرنا

کہ ممکن کو قمر سے نور اول کی ثنا کرنا

 

ترے محبوب کی تعریف کرنے کا ارادہ ہے

جو ممکن ہو تو اک پل کے لیے قدرت عطا کرنا

 

پریشاں ہوں کہ بندے سے کوئی لغزش نہ ہو جائے

کہ آساں تو نہیں حق نعت احمد کا ادا کرنا

 

پھر اس کے بعد میں ہوں اور حکم ان کا سر آنکھوں پر

وفا کرنا وفا کرنا وفا کرنا وفا کرنا

 

صدا آئی کہ جا تیرے قلم کو روشنی بخشی

کہ تعظیم نبی کرنا ہے تعظیم خدا کرنا

 

تری بندہ نوازی ہے کہ اپنے نور کو یا رب

بشر مانند کر دینا ہے پھر اس کو مصطفیٰ کرنا

 

خداوندا میں عاصی ہوں مریض خود نمائی بھی

وہ شافع ہیں ، مسیحا تو مرض کی تو دوا کرنا

 

قمر اس وقت تو حاضر ہے پیغمبر کی خدمت میں

تو ہم سب کی طرف سے بھی کرم کی التجا رکھنا

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ