اردوئے معلیٰ

Search

مثالِ ریگ مٹھی سے پھسلتا جا رہا ہوں

ظفر لوگوں کے جیون سے نکلتا جا رہا ہوں

 

بہت آساں بہت جلدی سفر ڈھلوان کا ہے

سو پتھر کی طرح پگ پگ اچھلتا جا رہا ہوں

 

کھنچا جاتا ہوں یوں اگلے پڑاو کی کشش میں

تھکن سے چور ہوں میں پھر بھی چلتا جا رہا ہوں

 

ہنر اس کھوکھلی دنیا میں جینے کا یہی ہے

برنگ آب ہر سانچے میں ڈھلتا جا رہا ہوں

 

کبھی محفل سے اٹھ آتا تھا اک ترچھی نظر پر

اور اب نفرت کی ہر پڑیا نگلتا جا رہا ہوں

 

ادا کرنے لگا ہوں روشنی کرنے کی قیمت

برابر جل رہا ہوں اور پگھلتا جا رہا ہوں

 

پرانے ذائقوں میں فرق سا کچھ آ گیا ہے

میں اپنا ذوق بھی کچھ کچھ بدلتا جا رہا ہوں

 

میں کس معیار سے اپنا مآل کار پرکھوں

بگڑ کر رہ گیا ہوں یا سنبھلتا جا رہا ہوں

 

ظفر بار ثمر سے جھک گیا ہوں میں زمین پر

جہاں والے سمجھتے ہیں سپھلتا جا رہا ہوں

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ