اردوئے معلیٰ

Search

 

مدینہ منبعِ خوشبو ہے شہرِ شاہِ خوباں ہے

وہاں کا ذرہ ذرہ لعل ہے ،گوہرہے ، مرجاں ہے

 

جھما جھم بارشِ رحمت ہوا کرتی ہے طیبہ میں

کہ خود جبریل اس رحمت کدہ کا نوری درباں ہے

 

نچھاور جان و دل اس گنبدِ خضریٰ کی رونق پر

مکیں جس کا انیسِ بے کساں محبوبِ یزداں ہے

 

مرے آقا کرم کی اک نظر قلبِ تپیدہ پر

حوادث کی تمازت سے مسلسل دل پریشاں ہے

 

کھلا کرتے ہیں دل میں داغ ہر شب ہجرِ طیبہ کے

مرے اس درد کا اذنِ مدینہ ہی تو درماں ہے

 

مری چشمِ تصور میں سجی ہے نعت کی محفل

نبی ہیں رونقِ محفل، نقیبِ بزم، حسّاں ہے

 

کرم پر منحصر ہے حاضری دربارِ عالی کی

وگرنہ منظرِؔ عاصی گناہوں پر پشیماں ہے

 

یہ ہی پہلا سبق ماں باپ نے تجھ کو دیا منظرؔ

محمد ہی مطافِ دو جہاں ہے کعبۂ جاں ہے

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ