اردوئے معلیٰ

Search

مدینے کو جائیں یہ جی چاہتا ہے

مقدّر بنائیں یہ جی چاہتا ہے

 

مدینے کے آقا دو عالم کے مولا

ترے پاس آئیں یہ جی چاہتا ہے

 

جہاں دونوں عالم ہیں محوِ تمنّا

وہاں سر جھکائیں یہ جی چاہتا ہے

 

محمد کی باتیں محمد کی سیرت

سُنیں اور سُنائیں یہ جی چاہتا ہے

 

درِ پاک کے سامنے دل کو تھامے

کریں ہم دعائیں یہ جی چاہتا ہے

 

دلوں سے جو نکلیں دیارِ نبی میں

سُنیں وہ صدائیں یہ جی چاہتا ہے

 

پہنچ جائیں بہزادؔ جب ہم مدینے

تو خود کو نہ پائیں یہ جی چاہتا ہے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ