اردوئے معلیٰ

Search

مرے آقا زمینیں اور زمانے آپ کے ہیں

جو ہیں کون ومکاں میں کُل خزانے آپ کے ہیں

 

بجائے خود ثنا ہیں لفظ محمود ومحمد

کچھ ایسے نام ہی رکھے خدا نے آپ کے ہیں

 

جو دامن حشر تک بھرتے رہیں گے، ہیں ہمارے

نہ خالی ہوں جو رحمت کے خزانے، آپ کے ہیں

 

یہ مانا آج ہم بھولے ہوئے، بھٹکے ہوئے ہیں

پلٹ کر قافلے سب در پہ آنے آپ کے ہیں

 

ازل سے ہے سفر میں آپ ہی کا نور آقا

زمانے وہ نئے ہوں یا پُرانے، آپ کے ہیں

 

مدینہ جن کے ہے دل میں، نظر میں سبز گنبد

وہ سارے مست وبے خود، وہ دوانے آپ کے ہیں

 

چراغاں ہے دلوں میں آپ کی شمع کرم سے

یہ روحیں مومنوں کی، آستانے آپ کے ہیں

 

متاعِ جاں اسے بس ہے یہی خوابِ مبارک

قدم چومے کمال بے نوا نے آپ کے ہیں

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ