اردوئے معلیٰ

Search

میرا اظہارِ محبت اُسے ناکافی ہے

ائے مرے ظرفِ سخن بھاڑ میں جائے تُو بھی

 

دل کو کم بخت لگے آگ اگر لگتی ہے

اور ائے دل کی چبھن بھاڑ میں جائے تُو بھی

 

رونقِ بزمِ تصور تھی کہیں جو نہ رہی

گردشِ چرخِ کہن بھاڑ میں جائے تُو بھی

 

جا، مری روح ، جہاں بھی تجھے جانا ہے ، جا

اور ائے میرے بدن بھاڑ میں جائے تُو بھی

 

نیند آتی ہے شبِ وصل زلیخا کو تری

یوسفِ مصرِ سخن بھاڑ میں جائے تُو بھی

 

دشتِ ویران ، فنا ہوں تو بلا سے میری

رونقِ باغِ عدن بھاڑ میں جائے تُو بھی

 

آخرِکار کہیں کا بھی نہ چھوڑا دل کو

جذبہِ دل کی لگن بھاڑ میں جائے تُو بھی

 

حیف ہے ائے مری خودساختہ وحشت تُف ہے

میرے بے ساختہ پن بھاڑ میں جائے تُو بھی

 

شدتِ کرب کہ الفاظ میں ڈھلتی ہی نہیں

حرف و تخلیق کے فن بھاڑ میں جائے تُو بھی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ