وہ جس کے نور سے یہ خاکداں درخشاں ہے
تمام عرصۂ گیتی میں ایک انساں ہے
عمل تو ہو نہ سکا کچھ مگر یہ کم تو نہیں
کہ دل میں پیرویِ مصطفی کا ارماں ہے
رقم بھی کرتا ہے احوالِ قلبِ ہجر زدہ
قلم نگارشِ مدحت پہ آپ نازاں ہے
حضور ! اُمتِ عاصی ہے آج خوار و زبوں
ہر ایک صاحبِ دل اُمتی پریشاں ہے
ہر ایک سمت لہو بہہ رہا ہے دنیا میں
لہو بھی صاحبِ ایمان ہی کا ارزاں ہے
عجیب خوف فضا ؤں پہ چھا رہا ہے حضور !
گلی گلی مرے شہروںمیں موت رقصاں ہے
حضور ! کس کو سناؤں میں اب فسانۂ غم
خفا ہے رب، تو یہ دنیا بھی مجھ سے نالاں ہے
عمل ہے زشت، دعاؤں میں کیا اثر ہو گا؟
دعا بھی زیرِ فلک مدتوں سے لرزاں ہے
ترے عمل کی نحوست ہے سب عزیزؔ احسن
کہ یہ بسیط فضا بھی مثالِ زنداں ہے