وہ زمیں ہے اور وہ آب و ہوا ہی اور ہے

شہرِ سلطانِ مدینہ کی فضا ہی اور ہے

شاہِ بطحا کی غلامی کا مزا ہی اور ہے

ان کی چوکھٹ پر جو آئے وہ قضا ہی اور ہے

کتنے شاہانِ جہاں پلتے ہیں ان کی بھیک پر

قاسمِ نعمت ہیں وہ ان کو عطا ہی اور ہے

آپ کی مدحت کا ہے اک سلسلہ ام الکتاب

ان کے خالق نے جو کی ہے وہ ثنا ہی اور ہے

سب حسنیانِ جہاں کہتے تھے اُن کو دیکھ کر

اِن کی چھب ہی اور ہے ان کی ادا ہی اور ہے

چاند سورج کھنچتے آتے ہیں مدینے کی طرف

گنبدِ پُر نور کی آصف ضیا ہی اور ہے