کریں منظور میری التجائیں یا رسول اللہ
مُجھے آپ اپنا دیوانہ بنائیں یا رسول اللہ
مجھے اب نعمتِ دیدار سے سیراب کر ڈالیں
رُخِ زیبا مجھے بھی اب دکھائیں یا رسول اللہ
رُخِ روشن کی گر عُشاق ہلکی سی جھلک دیکھیں
ہمیشہ نعت و مِدحت گنگنائیں یا رسول اللہ
جہاں پر آپ کے نقشِ قدم عُشاق نے دیکھے
وہیں عُشاق اپنا سر جھکائیں یا رسول اللہ
ادا کر لیں جو عاشق ایک سجدہ آپ کے در پر
ادا ہوں عمر بھر کی سب قضائیں یا رسول اللہ
تہی دست و تہی داماں ہیں عاشق آپ کے در پر
بجز اشکِ ندامت کیا لٹائیں یا رسول اللہ
ظفرؔ کی آپ سے نسبت ہو محکم جاودانی ہو
کریں مقبول عاجز کی دعائیں یا رسول اللہ