اردوئے معلیٰ

Search

کرے گا بابِ اجابت کو باز حرفِ نیاز

بہ فیضِ نعت ہے نقشِ فراز ، حرفِ نیاز

 

مَیں بے سبب نہیں بابِ ثنا پہ فرخندہ

خُدا کا شکر ، سخن کا ہے ناز حرفِ نیاز

 

حضور نعت نہیں ، حاضری کی حاجت ہے

حضور پیش ہے بہرِ نیاز حرفِ نیاز

 

یہی ہے درگہِ مدحت میں خامشی کا نقیب

مرے سخن کا ہے تنہا جواز حرفِ نیاز

 

پرو کے لایا ہُوں سانسوں کی ڈور میں تمدیح

قبول ہو مرے بندہ نواز ! حرفِ نیاز

 

مرے وجود پہ چھایا ہے عکسِ جاں کی طرح

مری حیات کا ہے امتیاز حرفِ نیاز

 

حضور سیدِ عالَم رہیں ثنا یاور

صدا کا ساز ، طلب کا گداز ، حرفِ نیاز

 

بلند لفظ و معانی نہیں ہیں وجہِ کمال

درِ کریم پہ ہے اعتزاز حرفِ نیاز

 

ذرا بھی شوخئ زورِ بیاں نہیں مقصودؔ

جہات شوق کا ہے ارتکاز حرفِ نیاز

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ