اردوئے معلیٰ

Search

کس کو سامع کرے سخن میرا

رائیگاں جا رہا ہے فن میرا

 

آنچ کچھ کم نہ تھی محبت کی

اب چٹخنے لگا ہے تن میرا

 

میں کہ اپنا ہی بن نہیں پاتا

کیا کہوں گا تجھے کہ بن میرا

 

رہنِ بے چارگی ، ترے جلوے

رزقِ آشوب ، بانکپن میرا

 

رُوح کی پیاس بجھ نہیں پاتی

سخت مشکل میں ہے بدن میرا

 

شوقِ عُریاں نے ستر پوشی کی

زخم ٹھہرے ہیں پیرہن میرا

 

مات ہر چال پر مقدر ہے

بیچتا خاک ہے چلن میرا

 

ائے رمیدہ ، گریز پاء خواہش

تجھ سے آباد تھا ختن میرا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ