اردوئے معلیٰ

Search

گر چاہتے ہو حسرتِ ناکام دیکھنا

بُجھتے دیے کی لَو کو سرِ شام دیکھنا

 

تھوڑی ہے زندگی مگر آغاز تو کرو

لازم نہیں ہے عشق کا انجام دیکھنا

 

میں سجدہ ریز ہوں مرے مسلک میں ہی نہیں

چوکھٹ سے سر اُٹھا کے سرِ بام دیکھنا

 

میں تو وہاں بھی سب سے زیادہ ہوں کسمپرس

فہرستِ بے کساں میں مرا نام دیکھنا

 

فی الحال کر لو جتنی بھی تذلیل کر سکو

اِک روز میرے عزت و اِکرام دیکھنا

 

جس لب کو چوم چوم کے تھکتے نہیں تھے تم

اُس لب سے خود کو موردِ الزام دیکھنا

 

کوئی تو ہے جو پھیرتا رہتا ہے سب کے دن

لوگوں کے بیچ گردشِ ایام دیکھنا

 

کرتا نہیں قبول کوئی رِندِ یار باش

محفل میں دوستوں کے بِنا جام دیکھنا

 

تعریف کوہ قاف کی اپنی جگہ مگر

فرصت نکال کر کبھی کالام دیکھنا

 

چکر لگے جو شہرِ خموشاں کے باغ کا

فارس وہاں سکوت کا کُہرام دیکھنا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ