اردوئے معلیٰ

Search
تاریک پہلو

سر بریدہ نہال ہیں ہم لوگ

کس قدر بد مآل ہیں ہم لوگ

 

پیکرِ صد ملال ہیں ہم لوگ

خستہ دل خستہ حال ہیں ہم لوگ

 

فکرِ عقبیٰ سے ہم کو بے فکری

صیدِ مال و منال ہیں ہم لوگ

 

سیئاتِ عمل خدا کی پناہ

اب تو ضرب المثال ہیں ہم لوگ

 

بے عمل ہی امیدِ حور و قصور

کس قدر خوش خیال ہیں ہم لوگ

 

اب قریبِ غروب آ پہنچا

آفتابِ زوال ہیں ہم لوگ

 

اک معمہ نظرؔ سمجھنے کو

اک نشانِ سوال ہیں ہم لوگ

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ