یارب ترے حبیب کی ہر دم ثنا کروں
تیرے کرم کا ساتھ ہو یہ ہی دعا کروں
دل میں ولائے سیدِ لولاک ہو بسی
ہر دم حضورِ قلب سے صلِ علیٰ کروں
میرے دیارِ قلب کی ہوختم تیرگی
عشقِ نبی کا قلب میں روشن دیا کروں
لب پر درودِ پاک کے نغمات ہوں رواں
کچھ اس طرح سے میں بھی تو خود سے وفا کروں
رکھ لیں کنیز مجھ کو اگر ملکۂ بہشت
پھر ہر گھڑی میں شکر کا سجدہ ادا کروں
قربت ملے حضور کی اس در پہ ہی رہوں
دنیا کی بھیڑ بھاڑ سے خود کو جدا کروں
اپنا بنا لیں ناز کو سرکار ذی حشم
ان کے نعالِ پاک پہ میں جاں فدا کروں
