لا ریب تیری ذات ہے ، اے رب ذوالجلال

فکر و خیال، حسن تصور سے ماورا

تُو احسن الصفات ہے، اے رب ذوالجلال

اک لازوال تو ہی ازل تا ابد ہے بس

ہر نقش بے ثبات ہے، اے رب ذوالجلال

پابند تیرے حکم کے مہتاب و آفتاب

گردش میں دن ہے رات ہے، اے رب ذوالجلال

تیرے ہی دَم سے ہیں یہ شرف یہ بلندیاں

تجھ سے ہی جیت مات ہے، اے رب ذوالجلال

دل آشنائے غم ہو بھلا کیوں؟ کہ ہر گھڑی

تیرے کرم کا ساتھ ہے ،، اے رب ذوالجلال

زیبا ہیں صرف تجھ کو ہی سجدہ گزاریاں

تو مقصدِ حیات ہے، اے رب ذوالجلال

زخمی جو آج محوِ ثنا ہے ترے لئے

تیری ہی التفات ہے، اے رب ذوالجلال